الحلقة 24 من رواية ولد الموجسره يكتبها محمود حرشاني

ولد الموجيره

رواية في حلقات

بقلم محمود حرشاني

 بعد ما كملت ايام العرس.في وادي الهشيم..رجع السبتي ومعاه  شهلة بنت عم فرج الحوانتي اللي ولات زوجتو لتونس..خدمتو في دار الاستاذه وداد المحامية تستنى فيه..اول مرة باش تخرج شهلة من دوار الهشيم وتفارق اهلها وخاصة امها ووالدها واخوتها.

.وقبل ما يخرجو قاتلها امها  خط راجلك في عينيك..ما عندك كان هو.. وصات السبتي وقاتلو رد بالك على شهلة .. ما تغضبهاش.. راهي امانه عندك..قالها السبتي تهنى با امي  مبروكه.. ما توصنيش على شهلة..ان شاء الله ما تسمع عليها كان الخير..

وطول المسافة  ما بين وادي الهشيم وتونس .. كان السبتي يحدث في شهلة على مادام وداد المحامية ..المراة الطييبة اللي باش يولو يخدمو عندها..قالها راهي مرا عندها مركز كبير وما عندها حد  اولادها الزوز في الخارج.. بنتها في فرانسا وولدها في جنوب افريقيا..قالها ما ك تعرف جنوب افريقيا. اي قاتلو شهلة ماهم يتحدثو عليها في الاخبار..ومنها شخصية كبيره  اسمو  مانديلا.. قالها السبتي هاذيكا هي.. ولد مادام وداد يخدم في ها البلاد هاذي وما يروح كان مره كل عامين..قاتلو شهلة  مرة كل عامين..قالها اي نعم اما هي تتواصل معاهم بهاك اللي سموها انترنات   والسكايب وتتحدث معاهم كل ليلة  تشوفهم ويشوفوها.

.اي قاتلو نعرفها ماهو زاده انا عندي تلفون مضخم.. وفيه زاده الفايسبوك.. قالها السبتي عندك فايس بوك ما تقليش زاده عندك اصحاب.. اي قاتلو عندي  نوره  بنت خالي  وسماح بنت جارنا عم الطاهر ونبيلة بنت المدب.. ما انا في الليل  نباتو نحكو مع بعضنا.. هذاك هو قالها السبتي  ما عندكش اصحاب اخرين. قاتلو اسمع السبتي كان تقصد اولاد انا ما عنديش.. اشبيه انا راني بنت فرج ومن ادراك.. هو انت ما كش امي معايا على فايسبوكي..

توقفت اللواج في القيروان باش يرتاحو الركاب شويه

قالها السبتي ابا نهبطو نرتاحو شويه ونشربو قهوة وكان تحب نوكلو حاجه خفافي وبلزمنا نوخذو المقروض لمادام وداد.. ما نمشولهاش ايدينا فارغة.

شهلة كانت كيف الورده الي مفتحة  وخاصة وهي في ابام عرس..وايديها  وساقيها مخضبين بالحنا القابسية.. وبعد  ما استانفت اللواج الرحلة لتونس علب النوم شهلة فاتكت على السبتي ورقدت.. هي اول  مرة تسافر والثنية طوالت  .

.كيف جاها النوم رقدت وما فاقت الا في محطة المنصف باي ...

 فيقها السبتي وقالها صحى النوم وصلنا لتونس..هي شهلة اول مره تجي لتونس قاتلو...  ماهو باش  تعرفني بتونس وتهزني للمرسى اللي غنى عليها فريد الاطرش  وغنت عليها نعمه زاده..ومن غير ما ترفع صوتها بدات شهلة تزن // البير والصفصاف والناعوره.. خلاو المرسى  مسمية مشهوره // اي قالها السبتي وين تحب زاده انهرك.. قاتلو سيدي بوسعيد ما انقولش لا.. ما تعرفش اللي سيدي بوسعيد غنى عليه مطرب الخضراء على الرياحي.

.اسمع تو قربنا لفيلا مادام وداد.. اي توى  يزي من الغنى  وخلينا  نسلمو  عليها ومن بعد   الايام طويلة  باش انهزك للبقايع الكل

نحل باب الفيلا الخارجي ولقى السبتي وشهلة ..ارواحم وجه لوجه مع مادام وداد..

 قاتلو اهلا بالسبتي الهراب.. ما تقليش هاذي شهلة اللي تهار الكل وانت تحكي عليها ..قالها السبتي هاذيكا هي  مادام شهلة حرم السبتي اللي هو انا..

وترمات شهلة تعنق وتبوس في مادام وداد..ومادام وداد تقلها  ما احلاك ما احلاك وما احلى زينك.. اي مبروك

تعرف  قالتلها قد ما كان يحكي عليك السبتي  انت في الواقع احلى.. الزين العربي ..

ما بقاوش واقفين برشه في الباب ودخلو لداخل..قالتها مادام وداد  من توى انت مولات الدار انا احسبني ضيفة عندك

شهلة ما كانتش تنتظر ها القبول هذا من عند مادام وداد..قالتلها يعيشك يا مدام وداد كيف ما يقول السبتي.. سامحني مازال فمي ما خرطش على الاسم..قالتها مدام وداد.

. تو يخرط تهني.. قللي انت قريت يا شهلة ..قالتها وصلت للسيزيام ومن بعد شديت الدار.. بابا ما خلانيش نواصل  رغم اللي انا كنتديمة انجي الاولى..قالها السبتي يحب بضحك مادام وداد.. اي تجي لولى كيف يقلبو الليسته يقراوها  بالعكس..قاتلها لا يا مدام والله لا.. كنت انجي  الاولى والا الثانية..ومن بعد تثقفت عاد وحدي

كيفاش قالتلها مدام وداد تثقفت وحدك ..

قالتلها  شهلة سلم ربي والاذاعة والمسلسلات المصرية والتركية والسورية تعرف يا مادام  هاك مسلسل باب الحاره.ما انفوت منو حتى حلقة والا عاد مسلسل  حريم السلطان وهاك هيام عاد..قالتها مادام وداد هاك موسوعة.. ما شاء الله عليك. مالا قاتلها وهاك احمد زكي  ونبيلة عبيد ويسرا وعادل امام وفاروق الفيشاوي..

اسمع يا السبتي يظهرلي شهلة دوبلت عليك..ملا ثقافة..وفي الفنانين صابر الرباعي وسلطان الطرب وعلية..قالوا زيني عامل حالة ..مالا لا..

قالتلهم مادام  وداد توى ترتاحو شويه راكم تاعبين من السفر ومن بعد  باش انخرجكم نتعشاو البره.. يلزمنا نفرحو بالعروسه.قالتها شهلة // عروستنا تشبه لقمر.. موش هكة  فنت علية  يا السبتي والا ما تعرفهاش الغنايه هاذي.

-----------------------

وغدا حلقة جديده من رواية ولد الموجيره

تاليف محمود حرشاني